Escoita os ‘Contos de Castelo’ alá onde esteas

A memoria é o que fai que sexamos como somos e o mellor xeito de mantela viva é a palabra. Os Contos de Castelo naceron para iso, para xuntarnos, falar e, sobre todo, para escoitar. A palabra téñena as nosas veciñas e veciños, sobre todo os máis maiores, xa que son elas e eles os que máis vivencias e saberes teñen gardados e compartilos é o mellor xeito de que non se perdan. É por iso que decidimos dar un paso máis e mudar o formato para facelo accesible a un maior número de persoas.

Nesta última edición, os Contos de Castelo convertéronse nun espazo de conversa radiofónico. Convidamos a algúns dos mellores comunicadores do país como Marga Pazos, Moncho Viña, Alfonso Hermida, Nacho Carretero, Arturo Lezcano, David Amor ou Carlos Blanco para conducir estes espazos nos que conversar e compartir nas tardes do Castelo Conta. Tone Martínez, Xosé Leis e Xosé A. Touriñán acompañaban tamén estas conversas coa veciñanza que ano tras ano non deixan de sorprendernos.

Así, coñecimos as historias das mulleres de Castelo coa participación das protagonistas, a intervención de Hadriana Casla -quen está realizando un traballo documental con elas-, a participación de Xabier Díaz e recuperamos cancións e acontecementos que marcaron a vida de moitas delas. Marga Pazos foi a encargada de conducir esta primeira xornada nin a calor extrema conseguiu quitarlles ás nosas veciñas o protagonismo.

Con Moncho Viña e Alfonso Hermida falamos do traballo, dos oficios e tamén do gusto de non facer nada cando toca xubilarse. Falamos dos traballos “da antes” e dos “de agora” e tamén dalgúns atemporais, como o dos taberneiros. Contamos tamén coa presenza da zoqueira Helena Ferro e con Celso Sanmartín, quen converteu no seu oficio a arte de escoitar e contar.

A infancia é a pequena patria de cada un. Volvemos ser nenas e nenos xunto con Carlos Blanco e Touri, cos que repasamos os xogos, as merendas, as normas estrictas dos colexios e a regras non escritas para namorar.

As lendas, os mitos e as supersticións tamén tiveron un oco con David Amor, quen escoitou “cousas de non crer” e tamén diferentes fórmulas e atallos para lles por remedio. É certo que o medo dá menos apuro cando estamos xuntos.

Non podía faltar a emigración, algo no que para ben ou para mal somos expertos. Falamos xunto con dous galegos emigrados, Nacho Carretero e Arturo Lezcano, das aventuras e tamén das cousas máis de diario de facer vida lonxe da casa. Ás veces por decisión propia, outras por necesidade, emigrar non é doado.

Podes escoitar os programas completos pinchando aquí ou na app do Castelo Conta, dispoñible para Android e iOS. Non esquezas compartilos con aquelas persoas que pensen que os van desfrutar, así entre todas e todas chegaremos a máis xente.