A gran festa da cultura no rural comeza nunha semana

Xa non queda nada para o Castelo Conta! A falta de rematar cos últimos preparativos, Castelo xa está listo para recibir o público nesta semana na que a nosa parroquia é o centro cultural de Galicia. Facemos repaso do que vai acontecer do 19 ao 25 de agosto, pero se non queres perder detalle, sigue as nosas publicacións en Instagram, Facebook e X ou consulta a programación completa do festival facendo clic aquí.

Este ano chega con novidades como a reapertura de Casa Rodríguez para aloxar a Taberna do Castelo Conta durante a celebración do festival. Alí poderemos mercar produtos de proximidade, conversar, tomar algo ou asistir aos Vermús na Taberna, que celebraremos de luns a venres en horario de 14.00 a 15.30 horas. Nestes vermús, contaremos coa participación de chefs de primeiro nivel que prepararán petiscos en directo e tamén cunha actuación musical no escenario instalado ás portas da taberna, en Folgueira.

Outra novidade será o espectáculo Castelo Arre ou Show, un formato inédito protagonizado por David Amor, David Perdomo, Federico Pérez, Isabel Garrido, Patricia Castrillón, Manuel Cortés, Tamar Novas e Xosé A. Touriñán. Para este espectáculo, así como para a Noite de Monólogos, xa non quedan entradas dispoñibles.

Para o que aínda estás a tempo de anotarte é para a Andaina do Día Grande do Castelo Conta. Podes facer a inscrición —e tamén mercar tíckets para o xantar e a cea— neste enlace. A andaina recupera este ano o seu percorrido polas aldeas de Castelo e contará coas actuacións de Marita Martínez e Celso Sanmartín.

Sen música non hai festa, así que este ano tamén teremos moita música. Nos Seráns nas Aldeas contaremos con Lamatumbá, Tiruleque e Maricarme. Boyanka Kostova pechará a festa o xoves 22 e Xabier Díaz & Adufeiras de Salitre, Sés e Dios ke te crew protagonizarán os concertos do venres 23. Para os concertos do venres, hai que adquirir entrada. Podes facelo aquí ou na billeteira do festival.

A Xente Miúda terá tamén unha semana moi intensa na que aprenderán a crear arte con Iria do Castelo, de Castelo Studio, coñecerán máis sobre o cultivo de froitas e verduras cos nosos veciños, saberán de primeira man os coidados que requiren os nosos montes para poder desfrutalos sempre grazas á Comunidade de Montes de Castelo e tamén terán unha achega didáctica e práctica ao mundo da equitación. Ademais, participarán en xogos populares, aprenderán a facer divulgación sobre o coidado do medio natural con Xurxo Carreño e terán espectáculos e concertos para pasar unha semana moi intensa e divertida.

Os Contos de Castelo repiten formato radiofónico, nesta ocasión con Federico Pérez e Miguel de Lira, Xosé Ramón Gayoso, María Meizoso, Marta Otero Mayán e Xaime Fandiño. Nestas tardes de radio falaremos de cinema, libros, banda deseñada, remedios, doenzas, supersticións, gastronomía, festas, deportes, entretemento e tamén do monte e o territorio. Contaremos con moitos convidados e coa participación das nosas veciñas e veciños; e tamén coa túa, todo o mundo é ben recibido nestas tardes de escoita e conversa. Este ano tamén nos achegaremos a dúas disciplinas cuxa base é a oralidade: a regueifa e o poetry slam.

E non podía faltar o cinema en Castelo. O luns 19 teremos unha das películas máis destacadas do ano, +Cuñados, presentada polos seus protagonistas. E termos tamén a estrea absoluta de Mulleres de Castelo, un proxecto dirixido por Hadriana Casla no que participan as nosas veciñas e no que levan traballando desde a pasada edición do Castelo Conta, momento no que iniciu este percorrido marabilloso cuxo resultado poderemos ver o mércores 21 na Eira do Ferrador.

Agora que xa sabes o que vai pasar, non deixes de vir coñecelo de primeira man. Agardámoste en Castelo.