Que se pode facer durante os seráns nas aldeas de Castelo?

O serán ou “tardiña” é a parte do día que vai desde que comeza a pórse o sol ata que se fai noite, pero en Galicia tamén se emprega este termo para referirnos a unha reunión nocturna con carácter festivo. Esta segunda acepción é a que o Castelo Conta adopta para unha das seccións máis variadas da programación do festival, o Serán nas Aldeas.

Cinco das setes aldeas da parroquia de Castelo converteranse en protagonistas durante o festival, acollendo as diferentes actividades e espectáculos que se realizarán de luns a venres a partir das 19:30 h. Mais, onde será e que se poderá facer cada día?

A primeira xornada será o luns 19 en Castelo de Abaixo. A Eira de López converterase nunha sala de cine para proxectar +Cuñados, unha comedia protagonizada por Miguel de Lira, Federico Pérez e Xosé A. Touriñán. A película, estreada hai uns meses nas grandes pantallas, poderá desfrutarse na parroquia natal dun dos seus protagonistas a partir das 20:30 h. Despois da proxección, Lamatumbá serán os encargados de abrir a programación musical do festival ás 22:00 h. A banda, autora de temas tan coñecidos como “Licor do negro café” amenizará a noite coa súa alma festeira.

O martes 20 a diversión trasladarase a Vilaverde co Regueifando en Castelo: festa e revolución. A Regueifa é unha das tradicións orais galegas que se están a recuperar na actualidade. Esta disputa dialéctica improvisada e en verso de carácter eminentemente rural pasou de ser un elemento de entretemento nas tabernas a vivir un momento de expansión e reivindicación. Os participantes intervirán a partir das 20:00 h e, nesta ocasión, serán Lupe Blanco, Manolo Maseda e Josiño da Teixeira. Por outra banda, o encargado de pechar a xornada do martes será o grupo de música tradicional galega Tiruleque. O grupo coruñés leva desde o 2002 percorrendo a xeografía galega e estatal, así como deleitando ao seu público cun repertorio propio de romarías e foliadas pero sempre na procura da innovación. 

Félix Rodríguez e Fran Rei volverán a Castelo o mércores 21 coa súa comedia Máis Saaabor!, un espectáculo que combina maxia, gastronomía, música, humor coa participación do público e que terá lugar na Eira do Ferrador (Xalo) a partir das 19:30 h. Esta proposta, dirixida por Avelino González, ofrece para todos os públicos un espectáculo en torno ao mundo da alimentación saudable e aos produtos de proximidade. As seguintes protagonistas da xornada serán as propias veciñas da parroquia, que verán por primeira vez o resultado do traballo documental colaborativo Mulleres de Castelo. O proxecto, dirixido por Hadriana Casla, comezou na pasada edición do festival, mais será o próximo mércores ás 21:00 h cando poderemos coñecer as historias vitais destas trece mulleres nunha película que reivindica a amizade, a diversidade e a vitalidade dos máis maiores. O tradicional tamén se unirá coa vangarda da man de Maricarme, un grupo formado por tres artistas recoñecidos do panorama musical galego. Antía Ameixeiras, Cibrán Seixo e Migui Carballido poñerán a bailar aos asistentes ao ritmo dos seus violíns, pandeiros e composicións musicais electrónicas a partir das 22:00 h. 

O xoves 22 Tone Martínez e Alba Bermúdez, da compañía Galeatro, situarán nunha das edificacións tradicionais galegas, os muíños, o escenario perfecto para unha representación teatral para os máis cativos e tamén para toda a familia. Lendas, tradición, música… Muiñada comenzará ás 19:30 h en Folgueira.

Os Seráns nas Aldeas rematarán o venres cunha das propostas máis innovadoras da edición, o Poetry Slam. Para aqueles que non coñezan esta competición, este formato con influencia teatral mestura a poesía coa interpretación, mais os participantes deberán defender as súas propostas poéticas ante o público para gañar un concurso. Peter Brea será o encargado de presentar o espectáculo que comezará ás 19:30 h. 

Agora que xa coñeces quen serán os grupos que actuarán e a que actividades se pode asistir, o único que falta e vivilo. Ademais, todas estas actividades son de balde, polo que non hai escusa!