A cita do xoves 22 coa comedia no Castelo Conta completa o aforo da polideportiva, e únese á noite de monólogos do sábado, que rematou todas as entradas poucos días despois de que sairan á venda.
Esgotadas as localidades para o Castelo Arre ou Show
Novo cheo no Castelo Conta. Nesta ocasión, para o xoves 22, na cita que congregará na polideportiva de Castelo ao mellor da comedia en Galicia nun espectáculo de sketches e música inédito. David Amor, David Perdomo, Patricia Castrillón, Isabel Garrido, Tamar Novas, Federico Pérez, Manuel Cortés e Xosé A. Touriñán serán os encargados de interpretar diferentes personaxes e situacións que nestes días escriben algúns dos mellores guionistas do teatro e o audiovisual galego.
O do xoves será, ademais, un formato novo en Castelo: o público desfrutará das actuacións disposto en mesas, desde onde poderán facer os seus pedidos de comida e bebida. A organización contará cun equipo de preto de cincuenta persoas para atender un evento que pretende consolidarse no festival.
Os concertos e a andaina, os últimos eventos con entradas dispoñibles
Logo de esgotar as entradas para as citas das noites de xoves e sábado, a quince días do festival só quedan localidades para os concertos de Xabier Díaz & Adufeiras de Salitre, Sés e Dios Ke Te Crew do venres, así como para a andaina polas aldeas de Castelo da tarde do sábado. Tamén para as citas gastronómicas: a churrascada preparada polas veciñas e veciños de Castelo no día grande, e a cea para recuperar forzas despois da ruta.