Unha nova edición do Castelo Conta arrinca mañá. Temos espectáculos e actividades para todos os públicos, xuntanzas, xantares e, sobre todo, moita gana de pasalo ben.
Comeza a mellor semana do ano!
Xa non queda nada, o Castelo Conta está a piques de comezar. De luns a domingo, a nosa aldea será o centro da cultura, para todos os públicos e desde o rural. Arrincamos a edición máis ambiciosa do festival, na que como gran novidade inauguramos os Vermús na taberna, unhas sesións de gastronomía e música nas que abriremos boca —en todos os sentidos— para as longas xornadas de conversas, películas, espectáculos, música e comedia que termos durante a semana.
Nesta edición batimos récords en canto á venda de entradas, esgotándose as da Noite de Monólogos e as de Castelo Arre ou Show en poucos días. Tamén voaron en poucas horas as prazas para a Xente Miúda. Quedan aínda entradas dispoñibles para os concertos do venres, nos que contaremos con Xabier Díaz & Adufeiras de Salitre, Sés e Dios ke te crew e tamén temos aínda prazas libres para anotarse na andaina do sábado. O resto de espectáculos e actividades son de libre acceso.
Se non podes vir acompañarnos a Castelo, lembra que nesta web e nas nosas redes sociais en Facebook, X e Instagram iremos contando o que aquí vai pasar con todo detalle. Na sección Ver e escoitar compartiremos as mellores imaxes e os resumos en vídeo das longas —e divertivas— xornadas que nos agardan ata o domingo 25, cando poremos o peche a esta edición coa Romaría do San Ramón, festa que deu orixe ao Castelo Conta.