Un festival máis accesible

O Castelo Conta terá nesta edición espectáculos accesibles mediante intérpretes de lingua de signos grazas á colaboración coa Federación de Asociacións de Persoas Xordas de Galicia. O director do Castelo Conta, Xosé Antonio Touriñán e o presidente da FAXPG, Iker Sertucha, presentaron esta iniciativa en favor da accesibilidade do festival para as persoas xordas.

Nun acto celebrado en Castelo, Touriñán e Sertucha deron a coñecer o acordo para mellorar a acesibilidade da programación de humor do festival. Desta maneira, o espectáculo Somos Criminais 3, con Carlos Blanco e Xosé A. Touriñán e a Noite de Monólogos do sábado 27, contarán con varios intérpretes de lingua de signos para facilitar o acceso das persoas xordas e con perda de audición. 

Xosé A. Touriñan quixo agradecer o traballo da FAXPG, destacando a necesidade de seguir camiñando na accesibilidade para públicos con pérdidas auditivas e outros problemas sensoriais. O Castelo Conta continúa traballando na adaptabilidade dos contidos da súa programación ano a ano.

O presidente da Federación da Asociacións de Persoas Xordas de Galicia, Iker Sertucha, destacou a importancia de achegar os espectáculos de humor e os eventos culturais ás persoas xordas.