Un día e unha noite para a memoria: o Día Grande do Castelo Conta

O Día Grande do Castelo Conta 2025 comezou en comunidade, arredor da mesa. O churrasco, os criollos, os callos veganos, o queixo Deleite A2A2 e a larpeira fixeron arrecender toda a parroquia e deron forza para unha tarde chea de emocións.

Logo chegou a Andaina, que levou á veciñanza e visitantes polas aldeas de Vilaverde, Castelo de Abaixo, Xalo e Folgueira. Cada parada converteuse nun pequeno escenario, coa música de Os Viqueiras e a Charanga Mil9, e co humor de Marita Martínez, David Amor, Pepo Suevos, Quico Cadaval, Oswaldo Digón e Gari Garrido, que fixeron que o camiño fose tamén un fío de risas compartidas. O remate foi na taberna, Casa Rodríguez, onde xa agardaba a cea: unha boa ración de fideuá e empanada para coroar a xornada.

Non rematou aí: chegou a Noite do Castelo Conta, que regresou á orixe do festival. Porque se algo lle dá sentido, dez anos despois, é seguir rindo xuntos. Galifunk Brass puxo ritmo á chegada e, no escenario, Quico Cadaval, Javier Veiga, David Perdomo, Oswaldo Digón, David Amor, Marita Martínez, Lucía Veiga e Patricia Castrillón fixeron tremer de gargalladas a polideportiva, coa aparición sorpresa de Marta Hazas. O humor apoderouse de Castelo unha vez máis, mantendo viva a esencia coa que todo comezou.

E cando a risa deu paso á festa, chegaron os Gin Toni’s. Co seu directo fresco e enérxico fixeron bailar e cantar a todas as xeracións, lembrando cancións que forman parte da nosa memoria colectiva. O peche púxoo DJ Mínimo, que prolongou o baile ata a madrugada, asegurando que este Día Grande quedase gravado no recordo como unha das xornadas máis intensas e festivas desta décima edición.

O Castelo Conta celebrou así o seu Día Grande coa mellor combinación posible: sabor, música, humor e comunidade. Un día e unha noite para a memoria, que demostraron, unha vez máis, que cando camiñamos e rimos xuntos, todo conta.

Xa podes ver as fotos na nosa web!