O cinema, protagonista do primeiro día

O luns comezou o Castelo Conta e non puido facelo de mellor forma. O tempo solleiro acompañou unha xornada na que o cinema e a música foron os principias protagonistas.

Os máis madrugadores foron a cativada da Xente Miúda, que tiveron a oportunidade de desenvolver a súa parte máis artística. Primeiro foron ata o Castelo Studio para aprender da man de Iria do Castelo a estampar bolsas con follas naturais, ademais de pintar outros obxectos, como unha serie de macetas. Tamén coñeceron como se realiza un videoclip grazas a Javier Seoane.

A xornada continuou cos Vermús na Taberna. Este luns Jorge Trigo, chef do restaurante A Espiga, foi o encargado de realizar os petiscos —unhas crocretas melosas e afumadas deliciosas— que serviron de acompañamento para os que desfrutaron da música en directo de Alana, gañadores do certame Galicia Crea no 2023. A Casa Rodríguez estreouse por todo o alto, non faltaron augas e bebidas para resfrescarse.

Xa pola tarde, trasladámonos a Eira de López. en Castelo de Abaixo, para escoitar todas as historias que os veciños compartiron nos Contos de Castelo. Nesta ocasión, Federico Pérez e Miguel de Lira foron os encargados de conducir o programa. Falamos de cine, de fotografía e doutros contos. Un dos convidados, Carlos Lorenzo, uniuse aos Contos para presentar o seu documental Cardoña, fotos a sete pesetas e falar figura deste fotógrafo itinerante de Carral. Tivemos a oportunidade de contar coa participación de Matilde Gestal, a filla de Cardoña. Tamén pasou pola mesa dos Contos Ana Moreiras, autora de Xaora e Madialeva, coa que falamos sobre literatura e as historias que nos inspiran para escribir.

Todas estas conversas deron pé a seguinte actividade do serán, a proxección da película +Cuñados. Contamos con tres dos seus protagonistas Miguel de Lira, Federico Pérez e Xosé A. Touriñán e co director desta exitosa comedia; Luis Avilés. A proxección convertiu por vez primeira a Eira de López nunha gran sala de cine ao aire libre.

Lamatumbá foron os encargados de poñer o peche ao primeiro día do Castelo Conta. Fixéronnos brincar con Licorcafé, Estírate can, Xa nos tardaba… e mesmo presentaron un tema novo: Botando leña. Un gran remate para un gran comezo de festival.

Este primeiro día estivo marcado pola calor, polas risas e pola cultura! Así é o Castelo Conta. Aínda estás a tempo de asistir ás actividades dos próximos días.