A cuarta xornada do festival trouxo consigo o arranque das actividades semanais, o inicio dos Contos de Castelo e unha chea de emocións: desde o talento da cativada en Xente Miúda ata a homenaxe sorpresa a Xabier Díaz, pasando polo humor reivindicativo de De Vacas.
Música, conversas e homenaxes: o cuarto día do Castelo Conta
O día comezou con Xente Miúda, o campamento infantil que converte ás crianzas en protagonistas dun espazo creativo e natural. Nesta ocasión, descubriron a técnica da cianotipia da man de Iria (Castelo Studio), xogando coa luz solar para crear cadros azuis con follas e flores. Unha actividade que combina aprendizaxe, xogo e memoria compartida.
Á hora do mediodía, foi a quenda dos Vermús na Taberna. Nacho Moreira (La Esquina de Valentina) e Jorge Trigo (A Espiga) fixeron maxia nas cociñas, servindo pinchos que acompañaron á música vibrante de Brais Morán e Nasaufunk, convertendo Casa Rodríguez nunha festa chea de enerxía.
Xa pola tarde, inauguráronse os Contos de Castelo cun formato renovado: un magazine en directo guiado por Marga Pazos, Óscar Cruz e Tone Martínez, no que a veciñanza compartiu lembranzas e segredos arredor da festa. Un espazo de conversa, humor e comunidade que abriu unha nova maneira de vivir o festival.
A continuación, chegou un dos momentos máis especiais desta edición: Xabier Díaz presentou o seu Cancioneiro Galego Serodio (1989-2012), unha obra que recolle máis de 600 coplas e 45 rexistros sonoros como homenaxe a quen fixo posible a transmisión da tradición oral. A conversa, conducida por Marga Pazos, pechouse cunha sorpresa: as Adufeiras de Salitre interpretaron unha cantiga para lle render tributo, recoñecendo o apoio que Xabier lle brindou ao Castelo Conta desde os seus inicios.
A noite culminou na Casa de López coa forza e a retranca de De Vacas, que fixeron rir e bailar ao público con versións atrevidas e cheas de reivindicación. Un concerto que puxo o broche a un día cheo de tradición, comunidade e alegría compartida.
O Castelo Conta segue sumando momentos inesquecibles, coa forza da palabra, a música e a memoria viva do noso pobo.
Xa podes ver as fotos na nosa galería!