A cativada ten o seu espazo no Castelo Conta

As mañás do Castelo Conta son para as e os máis cativos. A Xente Miúda é a programación especialmente deseñada para elas e eles, coa diversión e o respecto pola natureza como piares fundamentais. Esta actividade ten un éxito enorme, tal e como proba o feito de que as prazas esgótanse axiña edición tras edición. Pero non acaba aí o Castelo Conta para a cativada, temos varios espectáculos preparados para pasalo en grande con toda a familia!

O ano 2022, chegaban ao Castelo Conta Fran Rei e Félix Rodríguez coa súa particular food truck e fartamos de rir coas súas receitas, cancións e enredos culinarios. Dous anos máis tarde, regresan a Castelo con Máis Saaabor!, a segunda entrega destes dous chefs que, de seguro, serán os máis estrafalarios de todos canto pasen este ano pola parroquia. Estarán o mércores 21, ás 19.30 h, na Eira do Ferrador.

O Centro Dramático Galego está este ano de aniversario, como 40 anos non se fan todos os días, estano a celebrar ao grande. Unha das producións deste ano —en colaboración con Teatro ó cubo— é De Vilatriste a Vilalegre, un espectáculo que mestura o traballo actoral cos monicreques e que foi escrito por Roi Vidal Ponte. Chega a Castelo o xoves 22 a bordo da Utópica Rodante, un teatro móbil que levará o espectáculo por máis de 100 lugares de Galicia. Poderemos velos en acción o xoves 22, ás 12.00, en Folgueira.

O venres 23, finaliza a intensa semana da Xente Miúda. Para poñer un peche á altura estará con nós Uxía Lambona e a Banda Molona, cos seus clásicos da música galega pasados polo filtro do rock e adaptados ao público máis novo. O concerto será o venres 23 ás 13.30 horas na Polideportiva de Castelo. Agardamos por vós!