Xente Miúda para sementar o futuro

Non son poucas as festas de moi diferentes tipos que acaban coa xente da zona farta e intensos labores de limpeza. No Castelo Conta o respecto polo medio natural e pola veciñanza —da que e pola que xorde este festival— non se limitaron ao espazo da semana de programación; quíxose estender máis aló de xeito que o visto e vivido perduren no tempo e sexan semente para o futuro. Por iso as mañás estiveron dedicadas ás e aos cativos, á Xente Miúda.

Do campamento participaron un total de 40 nenos e nenas de entre 5 e 12 anos, aos que oito monitores, a veciñanza e o Monte Xalo lles aprenderon sobre o valor do noso patrimonio natural, a riqueza da cultura rural e da tradición oral, e das artes escénicas e a creación artística coma fonte de entretemento. Isto traduciuse nunha intensa serie de actividades coas que levar ao terreal os valores sobre os que botamos raíces. A cativada aprendeu sobre a flora da zona ao longo dunha andaina polo Xalo, no que tamén plantaron árbores autóctonas, desenvolveron un obradoiro de autocultivo e crearon un refuxio para insectos que favorecen a boa marcha das hortas. Tamén se divertiron con xogos tradicionais, papiroflexia e crearon unha obra de teatro que representaron o derradeiro día para as súas familias e para a veciñanza.

Mais o campamento non é un espazo educativo no que se chantan uns valores e se encerran nun microsistema, senón que os pequenos e as pequenas puideron ver que unha comunidade enteira como é a de Castelo fai a súa vida sen desarmonizar co entorno. Incluso estando en festas. Só deste xeito se entende que os veciños e veciñas deixasen as súas eiras e alpendres para facer concertos e representacións teatrais, que se minimizase o impacto ambiental do festival empregando envases sostibles ou que o día grande dunha semana de troula inclúa unha andaina de catro horas.

Para a realización de todas estas actividades contamos co apoio do Concello de Culleredo e da Deputación da Coruña; grazas ao seu impulso, estas actividades orientadas aos máis pequenos e tamén o resto de iniciativas de concienciación e educación medioambiental do Castelo Conta —como a iniciativa #senplásticosnomonte— puideron levarse ao cabo nas mellores condicións posibles.

Poñer o foco no miúdo —en insectos, sementes…— é aprender a mirar para así poder apreciar. Actuar, falar ou xogar é compartir o aprendido e así poder seguir aprendendo. Xente Miúda será un campamento para pasalo ben unha semana, pero tamén para ir cambiando, paseniño, a cultura do ocio actual.

 

X