Viaxamos de Galicia ao Mediterráneo Oriental

Xurxo Fernandes porá fin a xornada do xoves 25, cunha actuación que terá lugar na polideportiva de Castelo ás 23:00h. Unha sesión que suporá unha mostra musical e etnográfica das músicas de raíz.

A traxectoria deste artista bebe da cultura popular, da creación colectiva, da man das súas portadoras: as pandereteiras. É así que o creador coruñés pretende manter viva a rica tradición a través da súa presenza no panorama actual. Así, mediante a percusión de man e de voz, Xurxo Fernandes ofrece, ao longo do seu percorrido musical, un repertorio que mestura e complementa a tradición galega e a oriental sefardí. Unha ampla cosmovisión que teremos a oportunidade de desfrutar nesta edición do Castelo Conta.

Xurxo Fernandes é un gran coñecedor do folclore europeo. Logo de iniciar moi novo a súa investigación de campo sobre a tradición musical galega, percorreu lugares como Grecia, Turquía, Bulgaria ou Israel na busca das raíces do folclore. Xurxo é o único artista da súa xeración capaz de falar e escribir en ladino, lingua da comunidade sefardí que habitou a Península Ibérica ata 1492. Un músico único cunha proposta moi rica e orixinal para as Noites do Castelo Conta.

A entrada para este concerto é de balde.