O Monte Demostrativo de Castelo será o escenario dunha nova sesión formativa organizada pola Asociación Forestal de Galicia, centrada nesta ocasión nos servizos ecosistémicos e no papel que poden desempeñar na diversificación dos produtos e usos do monte galego. A actividade, titulada “Servizos ecosistémicos. Potencialidades e diversificación do monte”, terá lugar este venres, 12 de decembro, ás 17:30 horas, no Edificio Social Toñito Espiñeira, en Carral.
A xornada contará coa participación dos enxeñeiros de montes Xosé Covelo e Jorge Bouzas, quen abordarán cuestións fundamentais para entender o presente e o futuro dos montes como espazos que ofrecen moito máis ca madeira. O programa será o seguinte:
-
Servizos ecosistémicos: que son, potencialidades e diversificación dos produtos que ofrecen os montes. Relator: Xosé Covelo.
-
Metodoloxías de inventario e seguimento do uso recreativo dos montes. Relator: Jorge Bouzas.
-
Exemplos de servizos ecosistémicos certificados e oportunidades de financiamento. Relator: Xosé Covelo.
A actividade é totalmente gratuíta e forma parte do labor divulgativo e formativo arredor do Monte Demostrativo de Castelo, un espazo que nos últimos anos está a acoller propostas ambientais, culturais e sociais vinculadas ao territorio.
A organización anima a todas as persoas interesadas (comunidades de montes, propietarios forestais, persoas vinculadas ao sector ou veciñanza curiosa polo uso e futuro do monte) a asistir a esta sesión, pensada para ofrecer unha visión clara, práctica e actual das oportunidades que ofrecen os servizos ecosistémicos en Galicia.
