‘Mulleres que Contan’ entra na súa fase final: o reencontro das protagonistas
O proxecto retoma os obradoiros presenciais en distintos puntos do país, nunha terceira fase centrada no reencontro, a creación colectiva e a preparación do documental.
Tras unha primeira etapa de encontros presenciais e unha segunda fase de correspondencia audiovisual, o proxecto Mulleres que Contan inicia agora a súa terceira e última fase de obradoiros. Un momento clave no que as participantes volven atoparse para continuar un proceso creativo colectivo que desembocará nun documental, cuxa estrea está prevista para o verán de 2026.
As mulleres de Triacastela, Manzaneda, Baroña e Taboada retoman así os encontros presenciais despois de meses de correspondencia a distancia. Este regreso supón moito máis que unha continuidade: é un espazo para reforzar os vínculos creados e poñer en común todo o vivido ao longo do proceso.
Durante esta fase, os obradoiros céntranse en consolidar a dimensión colectiva do proxecto. A través de diferentes dinámicas, as participantes revisitan as súas propias historias, comparten reflexións arredor dos coidados e afondan en cuestións que atravesan toda a iniciativa: como queremos coidar e ser coidadas, que lugar ocupa o apoio mutuo nas nosas vidas ou como se constrúen redes de confianza no rural.
O proceso creativo avanza tamén cara á súa forma final. As sesións inclúen momentos de revisión e selección de materiais, nos que as mulleres participan activamente na definición da mirada do documental. A súa implicación resulta fundamental nun proxecto que entende a creación audiovisual como un exercicio compartido, no que as protagonistas non só contan, senón que tamén deciden como queren ser contadas.
Xunto ao traballo coa memoria e a palabra, esta etapa incorpora dinámicas orientadas a fortalecer a confianza e a cohesión do grupo. O corpo, o movemento ou a escoita convértense tamén en ferramentas para construír lazos, favorecendo relacións que aspiran a perdurar máis alá do propio proxecto.
Mulleres que Contan reafírmase así como un espazo de encontro e expresión para as mulleres do rural galego, no que a experiencia individual se transforma en relato colectivo. Un proceso que non só dá lugar a unha peza audiovisual, senón que tamén contribúe a tecer redes de apoio, combater a soidade e poñer en valor saberes e vivencias que durante moito tempo quedaron fóra do foco.
Esta terceira fase marcará o peche do traballo de campo e abrirá o camiño cara á montaxe e ás futuras presentacións públicas do documental. Un punto de chegada que é tamén, en boa medida, unha continuidade: a das relacións, as historias que comparten e a comunidade construída ao longo do proceso.
Mulleres que Contan é un proxecto de cooperación impulsado polos Grupos de Desenvolvemento Rural Sil-Bibei-Navea, Miño-Ulla, Ribeira Sacra-Courel e Deloa, en colaboración coa Asociación Cultural Castelo Conta, e financiado polo FEADER no marco da Intervención Leader de Galicia (PEPAC 2023-2027).