As lendas do Monte Xalo chegan ás vilas da contorna co libro de Lois Vilar

O Monte Xalo continúa a inspirar historias, investigacións e encontros arredor da súa identidade. Logo da súa estrea no Castelo Conta 2025, durante ‘A tarde no monte’, o libro Monte Xalo. Patrimonio cultural e tradición oral dun monte máxico, de Lois Vilar, inicia agora unha rolda de presentacións que levará a voz e a memoria deste espazo único a diferentes vilas da contorna.

O 6 de novembro o encontro celebrarase en Carral (Casa da Cultura, 20.00), con Manuel Ruibal e Xosé Bocixa acompañando ao autor. O 8 de novembro, a cita será en Cerceda (na taberna, 18.00), tamén con Ruibal e Bocixa, e o 14 de novembro pecharase o ciclo en Arteixo (Igrexa do Balneario, 20.00), cunha conversa entre Lois Vilar e Xabier Maceiras.

Natural de Sueiro (Culleredo), Lois Vilar é cámara de televisión e, sobre todo, un apaixonado divulgador da sabedoría popular. Leva máis de tres décadas recompilando historias, lendas, toponimia e tradicións arredor do Monte Xalo, un lugar cheo de misterio e significado compartido entre Carral, Culleredo, Cerceda e A Laracha. O seu libro recompila ese traballo paciente de investigación e memoria viva, converténdose nun testemuño esencial para comprender a relación entre o monte, as persoas e o territorio.

Monte Xalo percorre a vertente norte do cumio, onde Vilar documenta máis de quince medoñas, seis castros e sete pedras con petróglifos, ademais de fontes, brañas e penedos singulares que agochan ritos e crenzas antigas. O autor revela como a auga e as pedras foron soporte de lendas, prácticas curativas e expresións de espiritualidade que seguen a formar parte da identidade local.

O libro está dispoñible para a súa compra na tenda da web casteloconta.gal, e para todas as persoas interesadas en coñecer de primeira man o traballo de Lois Vilar e afondar nas historias, lendas e segredos do Monte Xalo, as presentacións do libro serán unha oportunidade única.