Avanza o proxecto de cooperación ‘Mulleres que contan’ en Baroña, Manzaneda, Triacastela e Paradela

Catro grupos de mulleres de Baroña (Porto do Son), Manzaneda, Triacastela e Paradela participan desde principios de agosto no proxecto de cooperación intraterritorial Mulleres que contan, dirixido por Hadriana Casla, do Colectivo Grigri, e que é continuación da iniciativa Mulleres de Castelo, que o Castelo Conta puxo en marcha no verán do 2023.

Durante a segunda metade do verán as participantes participaron en diferentes sesións nas que tiveron ocasión de reflexionar ao redor de pezas audiovisuais de distintas cineastas, realizaron exercicios de dramaturxia, exploraron a definición de diferentes palabras e traballaron sobre a simboloxía.

A finais de agosto tiveron ocasión de atoparse en Castelo, nunha sesión conxunta na aldea de Xalo, que serviu tamén para a presentación pública do proxecto a cargo das distintas entidades promotoras.

A iniciativa busca fomentar as relacións sociais, a cooperación e o fortalecemento de redes de apoio entre mulleres rurais, a través do intercambio de coñecementos, experiencias e a creación de espazos de conversación e reflexión, co fin de reducir as soidades e empoderar ás participantes.

Ao remate destas primeiras sesións os grupos de mulleres manteranse en contacto durante os meses de outono e inverno, para retomar os obradoiros a partir do mes de maio.

Mulleres que contan é un proxecto de cooperación impulsado polos Grupos de Desenvolvemento Rural: Asociación para o Desenvolvemento Rural Sil-Bibei-Navea, Asociación Miño Ulla, GDR Ribeira Sacra-Courel e Asociación Deloa, en colaboración coa Asociación Cultural Castelo Conta, financiado polo FEADER no marco da Intervención Leader de Galicia (PEPAC 2023-2027)