App ‘Monte Xalo’: un espazo dixital para descubrir o territorio
Xa está dispoñible a aplicación ‘Monte Xalo’, unha ferramenta creada desde o tecido asociativo de Castelo que permite coñecer o monte desde dentro, con rutas, patrimonio e contidos xeolocalizados. Un proxecto que une natureza, memoria e tecnoloxía.
O Monte Xalo segue sumando ferramentas para ser vivido, percorrido e entendido dunha forma máis completa. A nova aplicación ‘Monte Xalo’ pon o territorio no peto de quen o visita, integrando rutas, historia e servizos nun único espazo dixital baixo o lema todo o monte no teu móbil. Un proxecto impulsado desde a veciñanza e o tecido asociativo de Castelo, que reforza a relación entre comunidade, monte e coñecemento.
Xa está dispoñible de maneira gratuíta para dispositivos iOS e Android, facendo a información accesible para todo o mundo e permitindo descubrir o monte desde dentro. Combina información práctica, contidos culturais e recursos interactivos. Trátase dunha proposta pioneira en Galicia que reúne nun mesmo espazo rutas de sendeirismo, carreira e bicicleta, puntos de interese e información sobre o patrimonio natural e histórico do entorno, pensada tanto para quen visita o monte por primeira vez como para quen o percorre a diario.
A iniciativa forma parte dun proxecto impulsado pola Asociación Cultural Castelo Conta e a Comunidade de Montes Veciñais de Castelo, producido por Undodez e desenvolvido por Bjäland Technologies, no marco das axudas de dixitalización de Última Milla para o sector turístico financiadas pola Unión Europea NextGeneration EU.
A ferramenta incorpora un mapa interactivo no que é posible seguir rutas e localizar puntos de interese mentres se avanza polo territorio. A través da xeolocalización, cada espazo ofrece información contextualizada que permite ir descubrindo o monte en movemento.
Entre as súas funcionalidades destacan os puntos de interese distribuídos ao longo do Xalo, os filtros por temática e accesibilidade, as rutas deportivas e de lecer, e a información sobre servizos próximos. Un conxunto de ferramentas que non só orientan, senón que tamén explican o entorno.
A aplicación pon tamén o foco no patrimonio e na memoria do lugar, incorporando contidos sobre elementos singulares como a Torre de Celas, a Fonte das Meigas, a Pedra Casarula ou a Mámoa da Chan do Castelo, achegando historia, tradición oral e identidade a cada punto do mapa.
Neste sentido, ‘Monte Xalo’ non se entende unicamente como unha ferramenta de navegación, senón tamén como un recurso de divulgación e interpretación do territorio. Unha maneira de ler o monte mentres se camiña por el, conectando paisaxe, memoria e comunidade.