A festa tamén é da cativada: Xente Miúda esgota as súas prazas
As 80 prazas para a programación infantil do Castelo Conta 2026 xa están completas. Durante cinco mañás, as crianzas vivirán o festival desde dentro a través da natureza, a música, o teatro, a creación artística e o patrimonio de Castelo.
No Castelo Conta sempre houbo un lugar para todas as idades. Desde os encontros arredor da memoria e a tradición oral ata os concertos, a gastronomía ou as propostas familiares, o festival naceu coa idea de facer da cultura un espazo desfrutable para todas as xeracións. Xente Miúda é unha das iniciativas que mellor representa esa maneira de entender a festa: unha programación pensada para que a cativada tamén forme parte do festival.
As 80 prazas dispoñibles nesta décimo primeira edición xa están esgotadas, confirmando a boa acollida dunha iniciativa que medra ano tras ano e que se converteu nunha das propostas fundamentais do Castelo Conta. Entre o luns 24 e o venres 28 de agosto, as nenas e nenos de entre 5 e 12 anos participarán nun programa de actividades que combina natureza, creación artística, música, teatro e tradición.
A semana comezará cos obradoiros artísticos de Castelo Studio e cunha achega á contorna natural das fragas de Cabrois, onde coñecerán as especies autóctonas dos nosos montes. Tamén haberá espazo para o teatro coa representación de O tranvía Leonardo, de Fantoches Baj Monicreques; para o baile tradicional cun obradoiro impartido por Artur Puga; e para a música coa proposta de Xavi Lozano, na que as crianzas construirán instrumentos a partir de materiais de refugallo e descubrirán o son de obxectos cotiáns a través do espectáculo Tubos do mundo. A programación completarase cunha sesión de Cinema de Sombras, onde os máis pequenos e pequenas da casa explorarán novas formas de contar historias coa luz como protagonista.
Cinco mañás para coñecer o territorio, experimentar con diferentes linguaxes artísticas e descubrir novas formas de achegarse á cultura desde o xogo e a participación. Un espazo no que poderán facer novas amizades e crear unha chea de recordos!