A aplicación Monte Xalo, entre os sete proxectos finalistas de MetaHeritage

O proxecto Aranguelos, desenvolvido a partir da aplicación Monte Xalo, foi seleccionado entre os sete finalistas da convocatoria europea de MetaHeritage sobre patrimonio dixital, tecnoloxías inmersivas e turismo cultural.

MetaHeritage reuniu nesta fase final proxectos de diferentes países que traballan na intersección entre patrimonio, innovación dixital e novas formas de coñecer e experimentar o territorio. O pasado 5 de outubro, os sete finalistas presentaron as súas propostas ante unha audiencia internacional de investidores, axentes de innovación e potenciais socios estratéxicos.

Entre eles estivo Aranguelos, o proxecto no que se integra a aplicación Monte Xalo, unha ferramenta creada desde o tecido asociativo de Castelo para reunir nun mesmo espazo dixital rutas, natureza e historia, memoria e información sobre o territorio.

A aplicación naceu co obxectivo de achegar o monte a todas as persoas e aprender do lugar mentres se percorre. O mapa interactivo permite localizar puntos de interese e seguir diferentes percorridos, mentres que a xeolocalización achega información contextualizada sobre aquilo que aparece ao longo do camiño. A proposta combina así a dimensión práctica dunha aplicación para quen visita ou percorre o Xalo coa vontade de contar tamén o que hai detrás de cada lugar.

A través de Monte Xalo, é posible descubrir elementos como a Torre de Celas, a Fonte das Meigas, a Pedra Casarula ou a Mámoa da Chan do Castelo, pero tamén acceder a contidos relacionados coa natureza, a memoria e a tradición oral. O territorio convértese así no punto de partida dunha experiencia dixital que non separa patrimonio natural e cultural, senón que os presenta como o conxunto de herdanzas que a historia foi deixando nese lugar.

O proxecto está impulsado pola Asociación Cultural Castelo Conta e a Comunidade de Montes Veciñais de Castelo, producido por Undodez e desenvolvido por Bjäland Technologies, dentro das axudas de dixitalización de Última Milla para o sector turístico financiadas pola Unión Europea – NextGeneration EU.

A selección de Aranguelos sitúa agora este proxecto local nun contexto moito máis amplo. A convocatoria de MetaHeritage buscaba identificar iniciativas con capacidade para aplicar a innovación dixital ao patrimonio e ao turismo cultural, ofrecendo ás propostas seleccionadas un proceso de preparación orientado tamén a mellorar a súa capacidade para presentar o proxecto ante investidores e potenciais colaboradores.

Tras unha primeira fase de avaliación, sete proxectos chegaron ao Pitching Showcase final, procedentes de ámbitos moi diversos entre si. Aranguelos foi seleccionado xunto a MuseMind, Talking Paintings, TUNTU, ASTERIAE, Zoomguide e ART Out of The Frame.

Para un proxecto coma o noso, esta selección permite poñer o foco nunha maneira de traballar coa tecnoloxía que parte da intención de empregar o dixital para coñecer mellor o territorio que xa existe, facelo máis accesible e facilitar que as súas historias e os seus camiños poidan chegar a máis persoas.

A presenza de Aranguelos na final de MetaHeritage supón así un paso máis para o noso monte.

Detrás desta outra volta á festa
Participamos no foro ‘A Media do Camiño’ sobre o legado dos eventos no territorio
Axustes de cookies

As cookies son pequenos arquivos de texto que se gardan no teu navegador cando visitas páxinas web. Esta páxina web emprega cookies propias e de terceiros, que podes permitir ou bloquear nas seguintes pestanas.