Unha parte importante do que acontece no Castelo Conta sucede porque hai empresas, entidades e institucións que deciden acompañarnos cada ano. Algunhas levan xa varias edicións ao noso lado; outras foron sumándose co tempo e incorporándose pouco a pouco á vida do festival.

Cada colaboración ten a súa propia maneira de estar presente en Castelo: na Taberna, nos concertos, na programación para a cativada, nunha actividade concreta ou mesmo detrás dalgúns detalles que axudan a que todo estea a punto. Son achegas que forman parte da organización da festa e que fan posible que moitas das cousas que pasan durante a semana poidan suceder.

Este ano, Estrella Galicia, Cabreiroá, Deleite, Clínica Pardiñas, Méndez-Rojo, Cafés Lúa, Máis Enerxía e Cartón Atlántica volveron acompañarnos. Estrella Galicia estivo na Taberna e nas barras, e levou tamén ata Castelo unha cata a cegas e a presentación do Huebox en A Lacena Pequena. Cabreiroá estivo presente nas mañás de Xente Miúda e Deleite acompañou tanto a Taberna como os almorzos da programación infantil.

Outras colaboracións apareceron ligadas a momentos máis concretos. Méndez-Rojo e Cafés Lúa organizaron as súas respectivas catas na programación previa e acompañaron despois a actividade da Taberna e das barras. Máis Enerxía estivo detrás da iluminación dos espazos e acompañounos tamén na eclipse total de sol en agosto. Clínica Pardiñas deu forma a diferentes contidos do festival a través de Coa palabra na boca. E Cartón Atlántica facilitou os funxibles de papel e cartón empregados nos xantares e ceas.

Tamén houbo quen deixou a súa pegada en momentos moi determinados da semana. Alvac puxo as plantas que acompañaron as mesas durante a estrea de Mulleres que Contan; a FAXPG facilitou a interpretación en lingua de signos na Noite do Castelo Conta; e Ecos do Sur e a Asociación Parkinson Galicia participaron en diferentes propostas da programación.

En todos estes casos, a relación co festival parte de lugares distintos. Hai produtos, coñecementos, servizos, persoas e proxectos que encaixan en actividades concretas e que permiten que estas se desenvolvan como estaban pensadas. Esa é tamén unha das razóns polas que procuramos que as colaboracións entendan e conecten co que acontece en Castelo e co territorio no que se desenvolve o festival.

A esta rede sumáronse tamén as institucións que apoiaron a edición: o Concello de Culleredo, a Deputación da Coruña e a Xunta de Galicia, a través de Xacobeo 2027.

Ao final, detrás dunha semana de programación hai moito máis do que se ve desde o escenario. Hai quen pon un produto, quen achega un servizo, quen facilita un espazo ou quen fai posible que unha actividade saia adiante. Grazas a todas as empresas, entidades e institucións que nos acompañaron nesta décimo primeira edición e que fixeron parte, á súa maneira, desta outra volta á festa.