Seguimos avanzando na conservación da memoria de Castelo

Contar(nos) é un proxecto que nace da Asociación Cultural Castelo Conta e que quere consolidarse no tempo como unha referencia na preservación da tradición oral. Durante todo o ano, promovemos unha serie de actividades encamiñadas á recollida de testemuños e documentos de arquivo coa finalidade de catalogalos e preservalos. Deste xeito, coa axuda da veciñanza, recuperamos fotografías e películas filmadas en Super 8 e noutros formatos analóxicos, dixitalizámolas, catalogámolas e compartímolas coas veciñas e veciños para atopar as historias que hai detrás desta documentación dispersa. O noso propósito é conservar e compartir todo este patrimonio inmaterial propio, que nos permite falar da nosa identidade como pobo e como individuos.

Estes meses pasados, estivemos falando coas nosas veciñas e veciños mais maiores -e tamén cos que non o son tanto- para que nos facilitasen as fotografías ou gravacións que conservaban e que tiñan lugar en Castelo. A partir desa recollida inicial, fomos organizando todo o material, identificando ás persoas que nel aparecen, restaurando as fotografías escaneadas e dixitalizando os materiais audiovisuais. Feito este traballo, iniciamos un labor de catalogación que vai encamiñado á creación dun aqrquivo que vai medrando ano tras ano e que pretendemos ampliar tanto no espazo como no tempo.

E a partir deste traballo que realizamos diferentes compilacións destinadas a compartir coa veciñanza durante a realización do festival Castelo Conta, un evento que permite ampliar a difusión do proxecto grazas á súa proxección mediática e tamén compartir cun maior número de persoas vencelladas coa parroquia e que adoitan vir por estas datas. Entre eses materiais atopamos o libro A memoria de Castelo, distribuído de xeito gratuíto por todos os lugares de Castelo ou este proxecto que vimos de presentar e que consiste na compilación de parte do arquivo restaurado en Super 8 conservado en Folgueira.

Deste xeito seguimos a máxima do proxecto: achegar a tradición oral e a bagaxe cultural a todas as xeracións.

Este proxecto conta co apoio da Deputación da Coruña a través do seu programa de Subvencións para a Realización de Actividades Culturais FO203/2022.