Na xornada do venres asistimos á representación teatral dos máis novos e tamén dos máis veteráns. Gozamos coas xuntanzas populares, tanto para conversar como para xantar. E tamén desfrutamos coa música de tres bandas diversamente galegas.
De mañá, os miúdos e miúdas volveron ao Monte Xalo para achegar a súa contribución á contorna, mediante a plantación simbólica de especies autóctonas. Mais o día non remataba aquí para a cativada, pois esta xornada acolleu a estrea da súa propia obra, que xa viñan preparando dende o luns. Para pechar cinco días de actividades, os pequenos desfrutan da música de Pakolas en directo, antes de deleitarse cun xantar pensado para todos eles e tamén aberto ás familias e á veciñanza.
Co comezo da tarde, asistimos a última sesión dos Contos de Castelo. No Alpendre do Ferrador, reodeámonos de caras coñecidas a través de material fotográfico e audiovisual que os veciños e veciñas de Castelo tiveron a ben compartir con nós. Así, a tardiña pasou recuperando a memoria local a través das lembranzas dos seus protagonistas, que non só nos abriron as portas das súas casas senón que tamén os seus álbums familiares. Tamén puidemos ver películas en Super 8 que fixo xente da zona arredor da década dos 70 de escenas como un día de malla ou partido de fútbol sala.
Un día no que tamén tivemos o pracer de recibir As Fillas Bravas á súa chegada, directamente dende Momán. Trouxeron consigo as coplas da actualidade, coa determinación de deixar cada cousa no seu lugar. Tres mulles que, dende a tradición oral, nos falaron do presente máis inmediato sen renunciar á posta en valor das raíces. As cadeiras non chegaban para toda a xente que se achegou a velas, dende os máis maiores da casa cos seus caxato ata os máis noviños coa merenda na man.
Á noitiña, os veciños e veciñas de Castelo encargáronse de preparar a tradicional churrascada que desfrutamos todos antes da noite de troula. Finalmente, para pechar o intenso día e como non podía ser doutro xeito, chegou a música novamente a Castelo. Nesta ocasión, tivemos a oportunidade de desfrutar da música en directo de Xabier Díaz e as Adufeiras de Salitre, de Guadi Galego e de Moura. As tres bandas subiron ao escenario da polideportiva para repasar todo un interesante e diverso repertorio que conquistou a un público entregado dende o primeiro momento. Tocou despois ir durmir algo, pero non se preocupar, o día grande das festas do San Ramón aínda está por vir. Esperámosvos a todos e todas mañá.
