Produto engadiuse á túa cesta.

O Ministerio de Cultura escolle ao Castelo Conta para participar no X Encuentro Cultura y Ciudadanía

Celebrarase nas sedes do CGAC e do Museo do Pobo Galego do 24 ao 26 de setembro, coa participación de 25 proxectos de toda España. O festival será unha das quince iniciativas con espazo expositivo, e tamén participará nunha mesa de debate sobre memorias colectivas, transmisión y resemantización.

Só un mes despois do remate da novena edición do Castelo Conta, estaremos de novo de actualidade. O encontro anual Cultura y Ciudadanía, promovido polo Ministerio de Cultura, e que este ano se celebrará en Galicia, escolleu ao festival para participar nun dos foros máis destacados do ámbito da cultura a nivel estatal.

O Castelo Conta formará parte da relación de vintecinco iniciativas escollidas para participar no espazo expositivo e nas mesas de debate que, ao longo de tres xornadas, terán lugar nas sedes do CGAC e o Museo do Pobo Galego, en Santiago de Compostela.

O festival participará o mércores 25 ás 17.30 na mesa de proxectos ‘Memorias colectivas, transmisión y resemantización. Xenealoxías que coidan o porvir’, moderada por Inés de Egaña, e na que tamén estarán presentes o ‘Proxecto PALCOS’, do Instituto de Ciencias do Patrimonio (Santiago de Compostela), o ‘Diario Barrial’ do Atomic Lab (Mallorca), e o proxecto ‘San Pedro’, da asociación El Cinorrio (Villanueva de la Vera, Cáceres).

Ademais, o Castelo Conta será un dos quince proxectos que formará parte do espazo expositivo do foro ao longo das tres xornadas do evento, cuxo programa completo pode ser consultado na páxina web do Ministerio de Cultura. Para asistir ao foro será preciso solicitar praza neste formulario.

Foto: Aigi Boga

Noticias relacionadas

X