Desfrutamos do teatro, a música e a natureza nunha xornada na que a climatoloxía adversa non parou o Castelo Conta.
Nin a chuvia para a festa en Castelo!
A terceira xornada do Castelo Conta estivo enfocada na recuperación e na relectura; en dar novo sentido aos elementos do pasado. Conversamos sobre historias máxicas e asistimos as propias de Don Quixote para, finalmente, adentrarnos tamén no universo musical de catro grandes artistas galegos.
Na sesión matinal de hoxe, os Miúdos tomaron o Monte Xalo, protagonizando unha excursión na que descubriron a flora deste prezado entorno natural, que acolle ao festival ao longo desta semana. Nesta camiñada, a cativada, tamén aproveitou para apañar diferentes recursos que empregarán no próximo obradoiro, no que todos eles crearán un refuxio para insectos.
De novo, os Contos de Castelo deron comezo á tarde. Nesta ocasión, a temática envolveu a misticidade e as historias máxicas que forman parte da cultura popular galega. Aprendemos os ritos, costumes e crenzas de antano da man dos veciños que as viviron ou escoitaron delas. Un encontro que recupera grande parte da tradición oral do noso país.
Deseguido foi a quenda da cativada, quen desfrutou dun espectáculo teatral en chave cómica, protagonizado polos mismísimos Quixote e Sancho Panza. Ás costas dos seus particulares cabalo e burro, este dúo aventureiro personificou as súas mellores fazañas, achegando aos nosos miúdos e miúdas, non só o teatro, senón tamén unha parte importante da literatura clásica.
Coa noitiña, veu a música e á vangarda da tradición estaban Guillerme Fernández, Guadi Galego e Xabier Díaz. Un trío que trouxo de volta a enerxía das sesións ultramarinas, en acústico, versionando temas propios e tamén alleos. Xuntos, trouxeron as Versións Ultramarinas logo de dez anos sen xuntarse para estas sesións musicais que quenceron o corazón do público e fixeron esquecer a poalla que cubriu Castelo toda a xornada.
E rematamos coa música de Marta Gilino, coñecida como Russinha, unha artista que nos traslada a través da súa proposta electrónica na que emerxe o pasado e o presenta da música. Seguimos o xoves en Castelo, coa alegría por bandeira.
