No Castelo Conta facemos a festa cos veciños e cos amigos, gústanos estar sempre nas mellores compañías. Xuntámonos para bailar, rir, falar, compartir as experiencias dos nosos maiores, coñecer un pouco máis da nosa historia, descubrir novos xeitos de contar, de facer música, de divertir… Tamén camiñamos moito pola nosa aldea, monte arriba e abaixo, e seguimos bailando.
Nunha semana tan intensa de festa, o viño non pode faltar nos xantares, aperitivos e ceas. Con Méndez-Rojo Familia Adegueira únenos a paixón por coidar a tradición, desenvolver de xeito sustentable o medio rural e o respecto pola nosa contorna. Unhas adegas familiares, con máis de 80 anos de experiencia, que desde o corazón da Ribeira Sacra foron medrando paseniño ata producir viños das 5 D.O. galegas.
É por iso que Vía Romana Mencía e Mil Ríos Godello serán os viños oficiais do Castelo Conta, acompañándonos nos xantares, nos seráns e nas noites, compartindo a música, a conversa, as risas e, sobre todo, a festa!
