As actividades propostas teñen como obxectivo achegar á cativada a importancia da oralidade e a súa conservación e o respecto polo noso medio natural e o seu coidado.
Achegámonos á natureza coa Xente Miúda
O luns 22, arrinca o Castelo conta e comeza coa programación do festival deseñada para os cativos e cativas. A Xente Miúda do Castelo Conta terá lugar dende o luns ata o venres de 10.00 a 14.00 horas. Durante todo ese tempo, as actividades propostas teñen como obxectivo achegar á cativada a importancia da oralidade e a súa conservación, o respecto polo noso medio natural e o seu coidado e coñecer a flora e fauna que nos rodea.
Todo isto sen perder de vista a diversión, aprender pasándoo ben é máis doado e no Castelo Conta a diversión sempre vai por diante. Tamén almorzaremos diariamente con Deleite, para comezar o día con enerxía, temos moita actividade para esas catro horas de mañá.
Co obxectivo de que os Miúdos se acheguen máis á natureza, realizaremos accións específicas como un roteiro polo Xalo, para coñecer de primeira man a nosa biodiversidade e tamén diferentes obradoiros, como o de autocultivo, durante o que os veciños e veciñas de Castelo ensinarannos como cultivar as nosas propias verduras e hortalizas. Para esta actividade contaremos tamén coa colaboración de A Botica do Agro, quen nos facilita todo o preciso para poder ter unha boa colleita.
A semana rematará coa Función dos Miúdos, na que representarán unha obra que irán creando durante a semana. Como punto final, o xantar do miúdos contará coa actuación de Pakolas, que traerá o seu rock para que acabemos pasándoo en grande todos xuntos.