Casa Rodríguez, abre de novo as súas portas mañá venres 24 de xullo, marcando o inicio dun novo verán de actividade na parroquia e a conta atrás para a décimo primeira edición do Castelo Conta.

Durante décadas, Casa Rodríguez supuxo para Castelo e a súa veciñanza moito máis que unha taberna ao uso. Foi ultramarinos, lugar de encontro e un dos espazos máis importantes da vida social de Castelo. Alí compartíanse conversas, celebrábanse festas e construíanse moitas das relacións que deron forma á vida da parroquia.

Tras o seu peche en 2017, o Castelo Conta recuperou este espazo para devolvelo á xente da parroquia e da contorna, converténdoo de novo nun punto no que facer comunidade, aberto durante o verán. Hoxe, a taberna é un dos lugares máis emblemáticos do festival e tamén o primeiro espazo no que comeza a sentirse o ambiente do Castelo Conta, semanas antes da súa celebración.

A reapertura coincide este ano coas Festas do Santiago, que se celebrarán os días 24, 25 e 26 de xullo e servirán para inaugurar a tempada da taberna con cea popular, verbena, misa e procesión e varias sesións vermú.

Desde mañá, 24 de xullo e ata o 23 de agosto, a taberna abrirá de martes a xoves entre as 10:00 e as 23:00 h, e de venres a domingo ata a 1:00 h da madrugada, permanecendo pechada os luns.

Ao longo do mes de agosto, Casa Rodríguez volverá acoller unha programación paralela ao festival, que se irá anunciando progresivamente. Entre as citas máis especiais está A Eclipse en Castelo, o 12 de agosto, unha xornada especial para seguir o fenómeno que rematará cunha cea popular e o concerto de BÖJ.

E, como xa é tradición, durante a semana do festival regresarán os Vermús na Taberna, unha das citas máis recoñecibles do Castelo Conta. Cada mediodía, a taberna converterase nun espazo para compartir música en directo, gastronomía e conversa, reunindo artistas, veciñanza e público arredor das barras de Casa Rodríguez.

No marco da programación do 24 ao 30 de agosto, Casa Rodríguez abrirá todos os días en horario de 10:00 a 22:00 h, e volverá ser un dos principais escenarios do festival, con propostas culturais e gastronómicas ao longo de toda a semana.

A programación de Casa Rodríguez irase completando nas vindeiras semanas con novas actividades para todos os públicos. Como cada verán desde hai xa tres anos, a reapertura de Casa Rodríguez supón tamén a continuación do que sempre fixo: reunir á xente arredor dunha celebración.