Cando a festa remata, sempre quedan cousas dela nas nosas memorias. As cancións que aínda aparecen na cabeza, algunha conversa que se alongou máis da conta, as historias que volvemos contar e tamén os pequenos obxectos que nos permiten levar un anaquiño do que vivimos en Castelo connosco.

Por iso, o merchandising do Castelo Conta 2026 xa está dispoñible, tanto na tenda online da web como na aplicación do festival. Unha colección de pezas que recolle diferentes elementos da identidade desta décimo primeira edición e que permite levar un pouco do Castelo Conta máis alá dos días de festa.

As figuras e elementos gráficos creados para o Castelo Conta 2026 aparecen nas diferentes pezas, xogando con cores, composicións e formatos para facer que cada produto teña a súa propia personalidade.

Entre as novidades están varias camisolas de manga curta. Hai propostas como a camisola branca creada en colaboración con Deleite, cun deseño sinxelo inspirado nos cartóns dos seus produtos; a camisola marrón, coas figuras da identidade visual en azul ceo e a frase Outra volta á festa; ou os modelos en azul, amarelo manteiga e branco, que levan diferentes composicións das figuras e do logo do festival.

Tamén hai espazo para deseños máis ligados ao propio Castelo. A camisola da Taberna, Casa Rodríguez, recupera elementos que forman parte da vida deste espazo durante o festival: o viño, o café, os tomates da veciñanza e outros produtos que cada ano pasan pola mesa da Taberna. E entre as propostas máis gráficas están as camisolas con composicións en forma de cadros, nas que se reúnen diferentes elementos da identidade desta edición.

A colección complétase cunha camisola solidaria en colaboración con Ecos do Sur, cuxos beneficios se destinan integramente ao traballo da organización, e cun suadoiro azul con caperucha, que combina as figuras do Castelo Conta 2026 en azul escuro e rosa coa presenza do logo do festival.

Hai diferentes modelos e talles, incluídas algunhas propostas para a cativada e algunhas unidades xa son limitadas.

Pero o merchandising é algo máis que unha colección de recordos. Mercar unha peza do Castelo Conta tamén é unha maneira de apoiar un festival autosostible e contribuír a que poida seguir existindo. Porque detrás de cada edición hai moito traballo, moitas persoas e unha forma concreta de entender a cultura: desde o rural, coa veciñanza no centro e coa vontade de facer as cousas respectando o lugar que nos acolle.

O Castelo Conta non remata cando se apagan as luces. O que se constrúe durante estes días continúa no tempo e tamén pode viaxar connosco nunha camisola, nun suadoiro ou en calquera das pezas que forman parte desta colección.

O merchandising do Castelo Conta 2026 xa está dispoñible na tenda da web e tamén na aplicación do festival, para que poidas escoller a túa peza e levar contigo un pequeno anaco desta décimo primeira edición.