Edicións anteriores

2023

O ano da consolidación

A edición de 2023 asentou o modelo de festival singular, con actuacións íntimas en lugares pequenos, actividades para a cativada, música e artes escénicas para grandes audiencias, roteiros pola natureza, baile, risas…  en defitiva, unha gran festa!

Os Contos de Castelo mudaron de formato, para poder ser escoitados en podcast en calquera lugar, coa axuda de grandes comunicadores como Marga Pazos, Alfonso Hermida, Moncho Viña, David Amor, Carlos Blanco, Arturo Lezcano e Nacho Carretero.

Xabier Díaz regresou a Castelo para compartir a súa música na Eira de López, Susana Seivane armou a foliada en Vilaverde e Belém Tajes presentounos a súa música logo da estrea de ‘Nena’. Pola polideportiva pasou a Familia Caamagno como unha treboada e tivemos a sorte de poder ver ao Combo Viramundo de Xoel López compartir escenario con Muchachito e Lamatumbá. Por se fora pouco, Russ pechou todas as noites como DJ residente, contando o venres coa colaboración de Artur M. Puga.

Ghazafellos e a Gramola Gominola foron os espectáculos para os miúdos, que tamén aprenderon a facer unha chea de artistadas con materiais reciclados e cousas que hai polas casas. Viviron a gran estrea de ‘Bechos’ a última serie de animación da Televisión de Galicia e aprenderon a sementar as súas propias verduras.

Nesta ocasión, a andaina do Día Grande subiu ao Xalo. Alí agardaba Abraham Cupeiro, quen ofreceu unha mestura de concerto e clase maxistral sobre instrumentos milenarios. A choiva que respectara ata o momento o día, caeu con forza na baixada á polideportiva, onde á noite tiña lugar a noite de monólogos. Nesta ocasión, os protagonistas foron Noemi Rodríguez, David Amor, David Perdomo, Rober Bodegas, Javier Veiga, Marita Martínez, Lucía Veiga, Patricia Castrillón, Pepo Suevos e Federico Pérez.

2022

A volta do Castelo Conta

Logo de dous anos, había moita gana de festa, de risa e de baile en Castelo. Máis de 10.000 persoas pasaron polo festival na súa sétima edición. Un ano con moito teatro, ‘Somos Criminais 3’, ‘Hoy puede ser mi gran noche’, ‘As fillas bravas de Momán’ ou ‘Saaabor!’ foron algúns dos espectáculos que puidemos desfrutar en Castelo.

Caamaño&Ameixeiras deron o primeiro concerto da semana, ao que lle seguiron  Sés, que encheu a Leira de Himerio; Guadi Galego e Xabier Díaz & Adufeiras de Salitre esgotaron as entradas e Galifunk Brass e Los Mecánicos puxeron a festa no Día Grande.

A noite dos monólogos contou con Darlene e Noemi Rodríguez, Patricia Castrillón, Pepo Suevos, David Amor, Javier Veiga, Isabel Risco, Carlos Blanco, Oswaldo Digón e David Amor, con Touriñán como mestre de cerimonias.

Os Contos de Castelo homenaxearon a Finita Gay, quen desde entón preside unha das paredes do centro social de Folgueira, grazas ao mural feito polo artista ourensán Mon Devane.

2019

A consolidación dun modelo

O Castelo Conta de 2019 tivo lugar do 19 ao 24 de agosto e, coma sempre, contou cunha programación para pequenos e adultos chea de teatro, contos e música.

A “xente miúda” participou de luns a venres nas diferentes actividades dirixidas aos máis cativos: xogos de sempre con Dinamo, paseos polo monte con Lois Vilar, cociña co chef Alberte Gutiérrez, monicreques con Mircromina ou creación de decoración para a festa con Noela Gutiérrez. Fieis á esencia do festival, os Contos de Castelo volveron ás aldeas para que os maiores do lugar transmitan as historias de antes coa axuda de Tone Martínez.

Durante toda a semana, a programación acolleu espectáculos como Coleccionistas, con Marcos Pereiro, Federico Pérez e Oswaldo Digón; e os concertos de Sito Sedes, Pablo Díaz Trío, Xabier Díaz e Adufeiras de Salitre e De Ninghures. Unha actividade novidosa nesta edición foi A túa cara parece que me quere soar, a particular adaptación do concurso de televisión coa participación de Xosé Antonio Touriñán, Carlos Blanco, Marcos Pereiro, Federico Pérez, Pepo Suevos, Lucía Veiga, Oswaldo Digón, Gari e Marita Martínez.

O día principal, o sábado, non podía faltar o tradicional xantar con andaina, desde vez coa animación de Os Charangos e as contadas de Celso Sanmartín e Avelino González polo camiño. Para rematar o festival, volveron os monólogos do Castelo Conta, un espectáculo conducido por Touriñán, coa música en directo da Galifunk Brass e actuacións de Carlos Blanco, David Amor, Marita Martínez e Lucía Veiga, Gari, Marcos Pereiro e Oswaldo Digón. O peche estivo a cargo do concerto de Os fillos do estramonio.

2018

O Castelo Conta comeza a medrar

En 2018 o Castelo Conta celebrouse do 20 ao 25 de agosto cunha completa programación, desde obradoiros e outras actividades para os máis cativos e recompilación de contos da tradición oral polas parroquias ata música, artes escénicas e humor.

De luns a venres pola mañá os nenos e nenas puideron participar nos obradoiros de danza, música e canto con Sara Fandiño e de escenografía con Suso Montero e Noela Gutiérrez, así como na ruta de sendeirismo teatralizada polo Monte Xalo. Polas tardes, foi quenda dos Contos de Castelo, encontros cos maiores das aldeas das parroquias para recuperar nosa tradición oral. Nestes días, tamén houbo tempo de gozar coas artes escénicas: danza con Xacarandaina, teatro con Elefante Elegante e música con Xabier Díaz.
Na programación do venres destacou a sesión vermú con Voodoo, o espectáculo Somos Criminais, con Touriñán e Carlos Blanco, e o concerto de Os Revenidos.

O día grande celebrouse o sábado, cun xantar e andaina por Castelo acompañados de Quico Cadaval e Celso Sanmartín, coa música dos Charangos. Para rematar a xornada, o espectáculo de monólogos contou con Xosé A. Touriñán, Marcos Pereiro, David Amor, Pepo Suevos, Eva Iglesias, David Perdomo e Oswaldo Digón, así como o acompañamento musical de Galifunk Brass. O fin de festa estivo a cargo da Charanga Mekánika.

2017

Un Día Grande de Castelo Conta

En 2017 o Castelo Conta celebrouse un 26 de agosto en forma de andaina con monólogos. O público asistente compartiu aquel día unha andaina moi especial polas seis aldeas da parroquia de Castelo xunto cos mellores cómicos de Galicia.

Touriñán, Carmen Méndez, David Amor, Pepo Suevos, Cándido Pazó, Federico Pérez, Oswaldo Digón, Evaristo Calvo e Marcos Pereiro foron os encargados de descubrirlle aos camiñantes contos e historias nunha ruta que se converteu en escenario improvisado.

Para rematar, polo serán houbo unha cea-espectáculo, con monólogos e concertos.

X