Ulex

Ulex naceu en Santiago de Compostela case por casualidade, como unha aventura entre compañeiros do instituto que rematou converténdose nunha das propostas máis estimulantes da nova música galega. Formada por Xian Castro, Tomás, Mónica e Martinho, a banda construíu unha identidade propia arredor do que eles mesmos definen como rock atolondrado: guitarras afiadas, melodías pegadizas e unha enerxía que bebe tanto do rock clásico como do pop, da cumbia ou da escena alternativa actual.

O nome tamén fala deles. Ulex é o nome latino do toxo, unha referencia ao monte Viso e á paisaxe que os rodea. 

Tras publicar o seu primeiro disco, Lonxe de ti (2025), a banda comezou a sumar fitos nunha carreira que non deixa de medrar. Nos últimos meses pasaron por diversos escenarios que os consolidaron como unha das formacións emerxentes con maior proxección da escena galega.

As súas cancións falan de amores, rupturas e desa intensidade coa que se viven as primeiras emocións, sempre cunha honestidade que conecta de inmediato co público. 

Todo iso convive cun directo cheo de forza, no que a complicidade entre os catro integrantes, os seus xa característicos petos azuis e unha maneira moi particular de entender o escenario converten cada concerto nunha porta de entrada ao seu universo.

No Castelo Conta, o concerto de Ulex será unha oportunidade para introducirnos no seu imaxinario sonoro e conceptual, unha mestura de frescura e electricidade que resultará inesquecible para o público.