Natural de Xinzo de Limia, Manuel, coñecido artísticamente como Kid Mount, é un artista xoven que constrúe unha identidade propia arredor dunha mestura de ritmos de baile, melodías electrónicas e unha maneira moi persoal de falar das emocións, o amor e as experiencias cotiás.
A súa música bebe do neoperreo, o reguetón, o funk e o electro latino, creando un universo sonoro que el mesmo define como electro xinzo: unha combinación entre os ritmos que invitan a bailar e unha escrita próxima, sentimental e sen filtros. Nese equilibrio entre festa e intimidade atópase unha das claves da súa proposta.
Despois de traballos como NeoAmor, no que exploraba as diferentes formas de vivir e sentir o amor, en 2026 presentou Perreo Paradiso, un EP no que afonda nunha estética marcada polo reguetón dos anos 2000, a liberdade da noite e a idea dun espazo propio onde poder expresarse sen xuízos.
Ao longo da súa traxectoria foi creando tamén unha ampla rede de colaboracións con artistas da nova escena urbana galega, compartindo temas con nomes como Yuly, 9Louro, 9Collazo9, Chris Indian ou Dirty Suc. Estas conexións forman parte dun movemento musical que medra desde a colaboración e a amizade entre proxectos.
O seu último lanzamento, O buena que estás (2026), xunto a Dirty Suc, continúa esa liña de mestura entre ritmos urbanos, melodías pegadizas e unha identidade propia que se fai pegadiza para quen o escoita.
No Castelo Conta, Kid Mount levará ao escenario a enerxía dun proxecto que entende a música como un lugar para bailar, sentir e contar historias desde unha perspectiva propia, coa mirada posta no presente e coa súa particular forma de facer urbano en galego.